喺瑞典，每月總會有幾日城內特別人頭湧湧。市區嘅各類嘅消費場所，尤其餐廳、酒吧等等九成都會爆滿。疫情之前，唔預先Book枱基本上唔會搵到餐廳食飯。呢啲日子既不是節慶假期，周圍亦冇大減價，但人人總會迫不及待外出消費。到底呢日係咩日子呢？就係普天同慶嘅Lönehelg！
瑞典語Lönehelg/Lönefredag，Löne嘅意思係出糧， Helg解作周末，Fredag則解作星期五。而Lönehelg/Lönefredag就係指「出糧後嘅周末」。
同香港唔同，瑞典大部分公司嘅出糧日都會集中喺每月嘅25-27號。而如果出糧日剛好落咗喺星期六、日，就會提前於星期五出糧，所以瑞典嘅受薪一族對幾時係Lönehelg/Lönefredag都會有所共識。喺Lönefredag，唔難見到悉心打扮嘅民眾喺餐廳、酒吧消費。但相對醉酒鬧事嘅人亦唔少，據說城內嘅罪案率都會偏高。
Lönefredag來勢洶洶，翌日嘅大型傢俬舖、大型五金舖、各大商場，總之所有合家歡類型嘅場所都會被一家大細擠滿。唔止會大排長龍俾錢，美食廣場冇位，甚至連店員都會變得比較躁底。尤其近呢幾個月疫症橫行，冇乜必要我哋一家都會盡量避免月尾出現喺以上場所。
不過Lönehelg都有好處嘅，就係人人出手都會變得比較闊綽。如果我Lönefredag同先生出去約會，就必定有的士搭返屋企。就算唔外出用餐，我哋都會叫外賣。就連屋企貓咪都會受惠，有豪華罐頭食。我都真係幾易滿足㗎，不過知足常樂，係咪？疫情過後，各位讀者若準備嚟瑞典旅遊，記得揀好日子喇！