不少人當年要捱貴奶粉。（資料圖片）
中國奶業本來係一大產業，家陣經已玩完，更連累香港的小童及家長要捱貴奶粉。早前有人提議向內地奶粉客徵收離境稅，以穩定香港奶粉的供應及價格，但其實一點效用都沒有，你額外加五十蚊，內地要買香港奶粉的人，一定肯俾，反而有商戶想出開罐唔加價比較實際，起碼自己人賺番，自用的家長亦有方法平啲買奶粉。有嬰孩在家的友人嘆道，近日買奶粉又加價一成，藥房店員聲稱因來貨價上升，但友人直接查問供應商，對方則表示「冇加價」。其實一向都係零售賺先，好似政府加煙稅每包十蚊，便利店就收夠十二蚊，認真識計數。計落兩個半一支煙，仲貴過一隻雞蛋，甚至可以買到一個唔錯的麵包。想起一個香軟的白麵包就流口水，但又令我想起一件趣事。
記得當年沙士襲港，有位太太要到營地接受隔離，就喊晒口話：「白麵包點食嫁」香港人就是食不慣白麵包。此事又令我想到廣東人成日話，「無涼沖點得嫁」真古怪。「非廣東人的沖涼」是需要，「廣東人的沖涼」就是習慣，廣東友人亦深表贊同，並稱若一天不沖涼，真的渾身不自然，不論冬天幾凍都要沖涼。另一小友則說酒後或會不沖涼，但計我話，若醉酒就千萬不要沖涼，不然可能會浸死。真正上海佬都不會習慣每日沖涼，有上海朋友面對廣東太太鍥而不捨地要求他每天沖涼，還「校定水」讓他沖，唯有每天拿著毛巾入浴室Fing兩下水，假裝沖涼，哈哈！