瑞典嘅天氣總係飄浮不定，以為春天要來了，突然又風雪交加，呢兩晚更加跌至攝氏一度。天氣凍，人就自然想飲點湯水。但呢邊中式湯料唔容易買，煲完又只得我自己飲。所以就決定跟媽媽秘方，來個簡單又有營養嘅番茄蛋花湯，過一過湯水癮。
材料有番茄一至兩個，雞蛋一隻，薑一片，蔥花少許。首先拍好薑片，將番茄洗淨切成小塊，另外準備一煲滾水。將油加熱爆香薑片，加番茄炒。記得番茄一定要炒過先好味、滾出嚟嘅湯顏色先會靚㗎。炒到啲番茄開始有少少溶就可以加入滾水，水再滾之後就可以調至中小火，呢個時候你會見番茄顏色開始出現。喜歡濃味嘅話可以加入雞湯或者雞粉。我就鍾意清清哋，通常都唔會加。跟手打蛋，蛋液中記得加入少許鹽喎。將蛋液慢慢沿住筷子倒入鍋中。加入鹽、糖，胡椒粉調味。冇錯啊，阿媽話煮番茄最緊要落糖，味道差好遠㗎。最後熄火，加入蔥花就可以上碟喇。
番茄蛋花湯係我最喜歡嘅其中一道家常湯水，材料簡單易整又有營養。除咗滿足口腹之慾，重點係我每次飲嘅時候都會想起我媽媽，即使自己身在地球嘅另一端，呢個味道總會令我覺得返咗屋企一樣，飲完一碗身心都會暖晒。同場加影有雞湯浸西蘭花同蒜香蜜糖雞翼，又係充滿媽媽味嘅餸菜。的而且確，人愈大就愈懂珍惜家嘅好。每個家都會有屬於佢自己嘅專屬味道，唔知最能夠代表你家嘅餸菜湯水又係啲咩呢？有時間就去我Instagram或Facebook留個言話我知啦。