近來上社交媒體見到愈來愈多名人做直播，亦出現新的直播平台，Marketer自然最關心發展趨勢。Ray上星期四去咗HKMA數碼營銷會搞嘅Live Streaming研討會，聽業界多位專家包括Yahoo、 Facebook、新浪微博、騰訊、Isentia、 Ogilvy、華為、海港城等代表，介紹國內外做live直播嘅經驗同成功個案分享，真係得益不少！當中，海港城Karen分享早前請咗小P老師做直播，條片一共吸引咗2,800多萬瀏覽播放次數，已打破新浪微博在香港直播的最高觀看次數及小Ｐ老師的個人直播紀錄。而手機生產商華為早前直播曹星如比賽亦獲近2百萬觀看次數，搞得咁成功，講者都話事前功夫絕不能馬虎，每個步驟由選角、內容構思、網絡測試、直播前預告等等都經過精心策劃，因為直播無take 2，稍有差池都會惹來網民負皮，對品牌有壞影響。多人睇直播固然好，但如何將直播結合電商，創造更多商機，相信marketer都好想知。陸續有新的直播平台出現，如騰訊今年在港新推的直播app ‘VOOV’；Yahoo剛推出的速成電視和＄１團購頻道等，仲有facebook live亦預告會有更多新功能陸續出現，增加用戶與主持嘅互動性。相信睇網上直播將會是下一浪潮。