武漢肺炎恐慌下，全城搶口罩，你話如果最常用的一次用外科口罩可以處理完再翻用，就會輕易解決問題，但有冇咁理想呢？咁身兼立法會衛生事務委員會主席的民建聯議員蔣麗芸，前日在社交平台Facebook專頁上轉載一段內地訪問視頻，稱攝氏100度水溫蒸氣可消毒外科口罩並重用以解「燃眉之急」，令網友譁然，驚錯誤方法害死人，其他議員亦十分關注。昨日開衛生事務委員會特別會議，邵家臻議員要求出席官員澄清，外科口罩是否可以重用，要求正式講一次「口罩無論蒸炒煮炸，都唔可以重用。」衛生防護中心總監黃加慶回應指「以我所知無呢樣嘢」，並重申外科口罩只可一次性使用。不過，蔣麗芸當然唔甘心，繼續糾纏，更於其後在其Facebook上發新聞稿，表示「有頭髮邊個想做癩痢？有口罩誰人想再翻用？」同意口罩只用一次是最好方法，但仍堅持經蒸氣消毒重用非絕不可行，並指認為不可行的人毋須參考。
衛生署衛生防護中心其後透過Facebook專頁澄清，表示「外科口罩用完即棄，千祈咪洗咪蒸重用；千祈咪隨便相信網上非可靠來源嘅訊息！」
Ray就相信專家多D嘞。而家問題係政府有責任帶頭搵口罩供應，唔好為枝節問題，模糊咗問題焦點。
