話說Epic Games旗下嘅《Fortnite》iOS版，因為喺遊戲當中加入一個繞過App Store付款機制嘅付費功能，因此Apple要求刪除呢個功能，當然結果就係Epic唔肯，於是，呢場由一隻遊戲延伸至全個遊戲界嘅世紀大戰正式開始。一方面支持Epic嘅會話App Store分成太高因此繞過機制情有可原，另一方就會覺得喺人地個場賺錢又唔分錢俾場主屬無賴行為。由於法律上互有拉鋸，因此Apple後來更進一步，向法院要求刪除埋Epic喺App Store上嘅開發者ID，封殺佢哋Apple裝置嘅開發與支援權力。問題在於，Epic就係Unreal Engine(UE)遊戲引擎嘅持有公司，UE嘅知名度，甚至比公司及遊戲更有名。封殺Epic，等同封殺UE，會令到所有用UE開發(包括開發緊)嘅App從此絕跡，影響會非常嚴重。土下座稍為解釋，因為手機平台早已係最大嘅遊戲平台，開發者開發一款遊戲，好自然希望能夠做到跨平台推出(UE支援多平台使用)，假如日後用UE開發就要放棄iOS，極可能會令開發者選用自家或者其他遊戲引擎，絕對動搖到Epic嘅根基！(下集繼續)