識煮懷舊菜嘅師傅嫁得過

親，唔好誤會住，姐唔係咁恨嫁。我話「識煮懷舊菜嘅師傅嫁得過」嘅原因，係因為煮懷舊菜真係好花心機同耐性，亦要好有心機。集齊以上三大條件都應該嫁得過(好似係)。

就以君綽軒嘅古法八寶鴨為例，先要將全隻鴨起骨，起骨仲要特別小心，鴨皮一爛，啲餡就會漏，唔得靚仔。包入餡料之前亦要先煮好，分別處理好再撈埋，小心翼翼咁釀入鴨身。填到佢脹卜卜，再用竹籤封口，放入油鑊走油之後，再蒸佢起碼90分鐘。呢道菜式相傳係乾隆皇嘅最愛之一，俾皇帝睇中，當然有佢過人之處。喺我細細個嗰陣，每年過時過節成家人一齊去酒樓食飯都一定會order一隻八寶鴨，我仲好記得會特登挑晒啲栗子出嚟食呢！

雖然依家坊間都好少中菜廳做懷舊菜，趁住君綽軒推廣懷舊菜式，不妨一次過試埋古法油浸笋殼魚同窩貼鳳尾蝦啦！

君綽軒│北角油街23號港島海逸君綽酒店5樓 (港鐵炮台山站A出口) │2121 2691