(左起)梁卓偉、譚志源同陳國基，曾於不同時期擔任特首辦主任。
政府換屆，部分現屆問責官員不留任，其中政制及內地事務局大換班，局長譚志源(Raymond)同副局長陳岳鵬(Ronald)都相繼離開政府，Ronald更喺星期一已飛住美國波士頓讀書去也。
Raymond上周六晚搞咗場K局歡送愛將Ronald，順便同傳媒友好憑歌話別。出名人緣好嘅Raymond，當晚亦請嚟唔少神秘嘉賓，包括同樣即將離開官場嘅財經事務及庫務局長陳家強，亦有將更上一層樓「升呢」做局長執掌食衛局嘅陳肇始，以及將過渡新政府嘅候任特首辦主任陳國基，仲有做過特首辦主任嘅港大醫學院院長梁卓偉等。
係人都知Raymond鍾意唱歌，佢成晚幾乎咪不離手，中西歌曲都難唔到佢，點唱曲目包括《難為正邪定分界》、小鳳姐名曲《喜氣洋洋》同《My Way》等，傳媒就合唱《好心分手》送俾「雙R」同家強，大家開開心心唱足3粒鐘，盡興而歸。
Raymond (右二)、家強(右一)同Ronald(左一)即將分道揚鑣，陳肇始(左二)則更上一層樓。