臨開始此專欄前，我想了很久第一篇應該要寫些甚麼，於是我請讀者將問題傳給我。然後我在芸芸問題中選了這一題。因為愛自己就是快樂人生的基礎、所有幸福的開端，以此題目嚟作為專欄嘅第一篇再適合不過了。
該如何實行愛自己？其實答案好簡單，不斷令自己成為一個更好嘅人嘅過程就係愛自己。然而，何謂一個更好嘅人呢？細個嘅時候啲大人話讀書成績好就係好。懂事後你開始明白，讀書成績好，大個先會搵到份好工，有好工自然有好收入，收入豐足先能夠養妻活兒，然後買車買樓再買樓咁就叫成功！出咗嚟社會做事之後，你發覺窮人煩惱的確係特別多，但好多所謂成功人士都唔見得有幾開心。
從小嘅環境就教我哋要成為一個成功的人，但從來冇人問過我哋心目中成功的標準是甚麼、想成為一個點樣嘅人。唔好答我你想做李嘉誠個仔，我哋係講緊一個有何樣特質嘅人啊！例如一個擁有自信、懂得信任別人、心胸廣寬嘅人。日常生活中，被人打尖你會選擇挺身而出，還是忍讓？戀愛對象出軌，你會原諒還是分手？你會發現此類嘅問題開始湧現，全都沒有標準答案，然而每一個抉擇都係一個學習愛自己、認識自己嘅好機會。
愛自己就係慢慢向心中理想嘅樣子進發嘅過程。以尊重別人為前提，跟隨自己內心做決定，並樂意為自己做嘅決定所負責就是愛自己。愛自己，不止是個問題，同時是答案啊！