北京忽然放人，劉霞可以出國，都真係鬆一口氣。但係，如果咁樣就認為「北京聯德(歐)抗美」有睇頭，咁就真係時機錯晒。
咁真係要由盤古講起。查舊年侵侵上台之後，佢嘅對中政策，有一個重大的轉變，即係由過往同北京「又砌又傾」的政策，變成全面打壓。咁重大嘅轉變，直情係破壞了過往幾十年由改革開放而來(雖然八九六四之後有一段轉折)西方同北京的默契及操作，咁響歐洲佬來講，係幾驚訝。
歐洲佬之對中政策，好多人都知係經貿為主。商家佬要經貿，政客當然會配合。但係，歐洲有唔少選民，仲希望自己之政府，唔可以一味睇錢。佢地覺得，歐洲政府有責任去迫北京改善人權狀況。咁樣慢慢地，歐洲大國之對中政策就有「人權」呢個元素。即係每次歐洲佬同北京傾嘢，點都要傾「人權」。咁北京又會識做，放一兩個人權鬥士去海外，滿足了歐洲佬的需要，而歐洲佬又可以向選民交差，之後大家繼續做生意。
咁呢個世界好多嘢都係雙向嘅。近幾年北京覺得自己實力強咗，唔需要同歐洲佬玩呢啲遊戲，而且又搞one belt one road，唔使靠歐洲佬一樣可以擴大影響力，一於將異見者繼續收監。另一方面，侵侵政府唔單止唔玩呢啲遊戲，仲一於唔理你北京之人權狀況，即係話北京放人唔放人，拉邊個放邊個，侵侵都唔理。咁北京想借放異見者來換取美帝放鬆政策？No way。
然而，歐洲部分old seafood政客覺得，侵侵之對中政策只會造成災難，想延續過往政策，同北京繼續engage。如果北京識做釋放異見人士，咁歐洲就可以抗衡侵侵對中政策之輻射後果。所以，如果北京真係響農曆新年前後放劉霞，咁樣又撞正德國選舉，確係有助肥默繼續原有之對中政策，咁樣對歐洲同北京都有利嘅。
問題係，北京嗰時又唔知點解唔放。好啦，肥默依家選完唔係好掂，內政被聯盟政黨夾爆，另外成個歐洲之反中浪潮好犀利，肥默亦唔可以唔理。於是，依家就北京放咗人，肥默都冇能力扭轉番，由侵侵帶起席捲到歐洲的反中政策及浪潮。老實，依家肥默仲敢唔敢公開講德中友好呢？就算心裡面想，一定講唔出口。萬一佢心裡面唔想呢？唔好忘記，德國為了劉霞出國，真係搞咗好耐！
另一邊廂，英帝內閣換人，首相May姐依家要靠親歐派撐住個局。親歐派大哥之一係肥彭。肥彭就響May姐內閣之脫歐部長及外長辭職之時，要求外相要睇香港人權，呢封聯署有三十個保守黨國會議員簽名。言外之意，若May姐要取得親歐派支持，呢三十個議員嘅訴求：英國要關注香港人權的狀況，就要識做啦。
外交嘅嘢，真係時也命也。時機一過，返唔到轉頭矣。