我明個個的士司機都唔同，有啲帶住太陽開工，暖到我成日都充滿力量；有啲就雷神上身，隨時搵人劈；有啲鍾意講嘢，唔理你應唔應都繼續講；而今次我遇到呢個就係「陰招王」，成程每個位，佢都有陰招。
我一開車門，未講去邊，佢即刻落錶。我坐低同佢講早晨，佢唔理我。我唔介意。我屋企教我，朝早見人就叫早晨，可能佢屋企教佢千祈唔好同陌生人傾偈。我咪當上咗無人駕駛的士囉。
我錯！
原來個司機係會同陌生人講嘢嘅。次次就快到紅綠燈，佢突然好多嘢問「條路係咪咁行，過咗燈轉左定轉右？」唔係呀？！前面只得一條直路咋。佢踩慢架車，慢到綠燈轉紅燈。一到斑馬線，佢又即刻停定讓個阿叔先過。喂，個阿叔仲有成20米先到喎，佢當阿叔係閃電俠呀？！等轉燈同等阿叔過馬路，咁就俾佢陰咗8蚊。
佢駛到我公司樓下，咪錶係$99.1，十個司機，有八個都會收99蚊，我攞咗銀包，預備俾錢，叫佢俾返張單我，我諗佢唔通會收我100唔找？
我又錯！
佢竟然超慢咁伸隻手指出嚟，再超慢咁伸向個咪錶，直到個咪錶由$99.1，跳去$100.3，先㩒停個錶，跟住話「101蚊！」咁都陰多$1.9？！佢梗係諗「你搭得成百蚊的士，仲計咩一兩蚊？！仲話要返張單，一定claim公司啦。」
呢個唔係一兩蚊嘅問題，而係我做咩要受佢啲陰招？！佢陰我仲要陰我公司呀？！我望住佢，再望去個咪錶，再望返佢，跟住用超慢動作喺銀包揾咗3張20蚊、2張10蚊，再用超慢動作喺手袋摷個碎銀包出嚟，數咗3個5蚊銀、兩個2蚊、1個1蚊、1個5毫、1個2毫同3個1毫俾佢，然後慢吞吞話：「醒~你~！」