細細個同老佛爺(我婆婆)飲茶，早起身的話，一定會叫碟蝦子柚皮(因為好快賣晒，瞓晏咗就食唔到)。柚皮煮到入晒味，入口鬆化，次次都要叫兩碟先夠皮。細個唔識死，成日老佛爺整俾我食，依家先知原來做法繁複，難怪次次都被拒絕啦！
主打懷舊菜嘅雙喜樓，估唔到裝修堂皇華麗(聽講使咗過千萬裝修)，價錢都仲做到咁親民，平均百零蚊一個小菜，仲做埋午市套餐，以灣仔價嚟講算係咁喇。不過，有好幾款招牌懷舊菜式都係每日限定，又係遲咗冇得食！早前同大廚文師傅傾過，先知一碟蝦子柚皮要預備兩日咁耐！師傅話將柚皮汆水後要重複啤水同榨乾水嘅步驟3次，再用豬骨湯、鯪魚、蝦米同大地魚熬煮嘅湯煮兩個鐘再扣，絕對係心機菜，唔怪得之冇乜餐廳肯做啦！連灑喺面層嘅蝦子都再用白鑊加蒜炒過，一絲不苟，嗒落真係有種細細個食到嘅味道(利申：仲好young)。
雙喜樓
灣仔皇后大道東200號利東街地下G32號舖 2805 8828