相信好多朋友都知道，我響去年十一月參選高教界選委。我同我嘅團隊提出用白票。不過咁，會有個機制畀市民，只要佢地響公民提名度拿到足夠人數，我地就會提名佢。我地最後輸咗。我仲輸得幾肉酸。既然選民唔鍾意我地白票團隊，認為應該要善用選票去「造王」，咪交畀選民決定，我就繼續我嘅教學研究工作。
結果大家都知啦。所謂「造王」，最終都係上面吹雞，下面跪低。到依家為止，仲有好多泛民支持者仲響度同室操戈，認為應該唔好投白票，點樣這樣那樣。俱往矣。面對現實啦。
網上KOL話畀大家聽，本地商家佬好憎北方來的新資本家，覺得佢地搶飯碗，又好唔鍾意呢屆政府嘅領導，於是就好有誘因，想同本地嘅溫和力量合作。本地薑嘅溫和力量有兩個，一個係溫和泛民，即係依家泛民班大老啦，仲有就係開明建制，即係依家一班聲稱應該對港政策方面寬鬆嘅建制派人士啦。
呢個雞棚，聽落去都幾合理㗎。只要幾個組合埋位，加埋北方大人只要忽然明察秋毫，覺得應該將香江政治擺向中道，同埋加埋一班有同樣思維嘅公僕一齊，照道理咁樣係有利局面嘅。
但係，我梗係覺得唔妥啦，因為咁樣咪代表著，將香江拉番去十年前嗰種官商「合作」嘅局面，都係唔得囉，因為我地香江依家需要解決貧富懸殊同青年向上流動PK之問題，而唔係重回官商合作嘅舊路。之但係，我呢套approach不為選委選民支持輸咗。既然輸咗，我亦無話可說。所以自從輸咗之後，除咗響電視節目偶然吹幾句嘴講下香江領導之選情外，文章臉書一於閉嘴，唔好畀人話我輸咗仲指指點點。
結果呢？就係睇到，本地商家佬基本上就冇deliver到。本地有錢佬買兩邊，一邊係三條七，一邊就係鬍鬚。佢地就A壓B，又借B壓A，總之搵盡著數。至於所謂建制開明，你話佢地最終服從紀律又好，你話佢地其實同本地商家佬咁樣，借開明同溫和呢作為手段四處搵著數都好，最後都係冇走票。講到呢度，嗰啲乜嘢商界會有百幾二百票「良心」型之選委，咪一樣走數，係未？
呢件事其實都幾好嘅教訓。以前泛民大佬有句說話：北京不可信，英人不可靠，商家不可合，依家就唔知點解，有乜嘢因素令班大佬認為，只要集結到足夠的民望，北京就會大發慈悲，忽然間就放棄對香港之強硬措施，仲要立即轉換立場，一夜之間轉得好溫和呢？
既然有咁嘅誤判，覺得上面點都會放手有公平競爭，於是就出晒事，all in 就衰咗。說到底，北京龍門任搬，遲遲未有普選，係罪魁禍首。不過，泛民學識嘅，就係唔好太過相信某D中間人話， 北京最後會絕地覺悟啦！