唔好話我成日同港鐵過唔去。去勻咁多城市，我城鐵路服務係真係世界最高水平。冇之一，係最高水平。
早排去台北。有人話，佢地服務唔錯。好似係。想買張yoyo卡。問counter，答曰：「賣晒！」吓！賣晒。再問：「幾時有？」答：唔知。
OK，去買單程飛囉。結果，就走咗去便利店買到一張卡通造型的yoyo卡特別版。我問便利店工讀生：有冇張正常卡賣？答曰：賣晒好耐啦。
試下你地響港鐵站買唔到「發達通」？暴動都似。
響台北等地鐵，其實係得搭一個站。但係，響月台左望右望，都唔知搭邊條線啱數。因為響月台嗰度，只會顯示終點站叫乜嘢名，係冇顯示到下一站叫乜嘢名。結果我要走去月台中間一幅大圖，搵番個終點站名，先至知我要企邊一處月台。
香港？梗係有話你知下個站係乜嘢名，等你唔會走錯。但係，搭車服務以外呢？有時會笑死你。
話說發達通公司有檔嘢叫「柯你披」，係電子貨幣。聽講用手機可以「嘟」錢嗰隻。我素來鍾意試新嘢，用過「生果披」，梗係要幫襯下土炮啦。
於是上網八卦睇，「柯你披」生果手機App可下載試用。我成屋都係生果機，梗係開心啦。
但生果手機之「柯你披」，係需要一個讀卡機配合至可以用。呢個讀卡機，成288蚊。不過，網站promo話，正呀，依家呢部生果手機專用讀卡機，只要響生果手機下載「柯你披」，就會有個電子coupon個code畀你。用呢個電子coupon，就可以去「發達通」網站買讀卡機，有一半discount呀！
平一半試下土炮嘢，梗係ok啦。於是，我就即刻下載App。仲開通咗個App。手機App又講咗個discount code我知。我好高興咁就去「發達通」網站，諗住特價買讀卡器。咦！有問題。
「發達通」網站話，佢地唔收信用卡買嘢，佢地只會收「柯你披」。喂！阿哥，我正想買個讀卡器去用「柯你披」，你就叫我用「柯你披」去買讀卡器，我得部生果手機，點用部生果手機去你個網站嗰度買「讀卡器」呢？阿哥，你玩我呀？
於是，我「屈濕」去搵電腦A求救。
電腦A聽完：x！邊有人用「柯你披」㗎……Anyway，叫我用Android手機去買。我同電腦A講，我全屋都係生果手機，邊處有Android機㗎？如果有Android機，我仲使去買讀卡器？電腦A話，唔係部部Android機都得㗎，係要有NFC功能至得。佢仲勸我，咪落街買部有NFC功能之Android機，再下載「柯你披」，然後就用Android手機之「柯你披」去買部讀卡器啦，跟手笑咗成一分鐘。
由於當時已夜深，我第二日又飛去台灣，於是就唔理件事。仲想話，台灣返來問下「發達通」公司點樣處理？點知到我記得呢件事之後，發現已經冇咗呢個discount了。
真係，諗番起都想笑。我唔係唔想用土炮嘢，但係……。哈哈哈！！