(照片由作者提供)
前幾日喺個飯局度見到個前輩，唔知點解啲老人家見到啲年輕人都好鐘意先講兩句類似讚美嘅說話之後就開始批評吓啲後生嘅。「哎！而家啲年輕人，乜都鬧。又仇富、又唔識尊重長輩。睇下個立法會，一塌糊塗。總之啲後生嘅就覺得自己啱晒！」
以前的我，老人家咁講，我就會話：「係囉係囉。」
而家可能30有多，唔算太年輕。聽到長輩講這種似是而非的類似問題嘅物體，我會天真地發表吓自己嘅偉大見解，今次亦不例外。
我話：「或者可以將您嘅見解分兩個部分嚟睇，從我一個卑微嘅年輕人角度去分享一下？」
佢點頭後我繼續講：「先講立法會啦，分建制反對兩派。其實咪好似你搭的士咁。第一種司機就係嗰種唔識路，然後帶你係咁兜路，但係態度好好嘅司機。兜晒路咁到達目的地之後，你都係要埋單。
咁第二種司機就喺嗰種有啲小聰明，但係態度超差，不停鬧哩鬧路，手車超Chok，然後特登兜路。最後停唔到喺你要嘅目的地門口，總係要停喺一兩個街口外面嗰種的士司機。結果係，屈你埋單。」
我繼續講：「當然，立法會裏面係有好多非常令年輕人尊敬嘅前輩的。只不過，睇住目前的開會風氣，就好似搭咗以上的兩種的士一樣，難免一肚氣。所以係好似您話齋，一塌糊塗嘅。」
講到這裏，我算順住佢條氣，所以這位老人家仲未表現不耐煩，我就借勢繼續講：「至於年輕人乜都鬧，其實如果細緻咁分析，佢地係選擇性咁鬧。佢地唔會鬧曹星如、佢地唔會鬧周潤發、佢地唔會鬧喺街頭表演嘅音樂人。相反，年輕人都會為佢地歡呼。」
聽到這裏，呢個老人家有點疑惑，畀我嘅感覺係仍然有興趣聽落去。所以我繼續講：「曾經，謝霆鋒俾人鬧死；曾經，麥浚龍俾人鬧死；曾經，欣宜俾人鬧死。而家，任何活動見到佢地出場，您都會發現佢地嘅掌聲歡呼聲都比同場的其他嘉賓熱烈。」
老人家問：「係囉，點解會有咁嘅轉變呢？」
我話：「因為佢地有香港仔精神囉。」
香港仔精神，係唔會因為你有錢所以崇拜你；唔會因為你官位高所以敬畏你。香港仔精神，係敬重經歷過鍛鍊、磨練同歷練嘅善良人。
「鍛鍊」係讀書，係訓練。
「磨練」係挫折，係敵人對你嘅傷害。
「歷練」係堅持，係不放棄，繼續向上。
「善良」，咪就係善良囉。
曹星如係香港仔。謝霆鋒係香港仔。麥浚龍係香港仔。欣宜係香港仔。周潤發係香港仔。街頭音樂人係香港仔。
如果你留意一下，一個人如果能夠好好咁經歷晒以上歷程，佢嘅人生係成功的，行出嚟都好令人尊重的。
咁以上四個要素只達到三項又如何呢？我地分析一下。
如果有鍛鍊、磨練同歷練，但係欠缺善良。畀個特首你做都唔會受廣泛人尊敬。
如果有鍛鍊、磨練同善良，但係無歷練。個個打工仔都係咁啦。
如果有鍛鍊、歷練同善良，但係無磨練。咪嗰啲成世唔係有挫折嘅富二代囉。
如果有磨練、歷練同善良，但係無鍛鍊。等於無左任何嘅知識技術基礎，粗人一個，只能幹粗活。
其實，香港係好容易寬恕人的。有啲人衰咗就摺埋，咁就永遠摺埋。好似關心妍𤓓過一次就摺埋，咁就永遠都只會摺埋。有啲人衰咗就拍拍啲塵，繼續前行。好似謝霆鋒、麥浚龍、森美、曾俊華等等，最後都贏得大眾嘅支持。
所以每當我自己工作上面對一啲險惡嘅人、或者遇到無奈嘅挫敗，我都會覺得自己在儲「磨練」值，感謝敵人俾機會我好好咁做個香港仔。
因為，香港從來都唔會放棄失敗過嘅人。