有班人仲以為，美民主黨啟動對侵侵之彈劾案，係可以把侵侵拉倒。侵侵當作係選舉前菜，當國會之要求睬佢都傻，最後又一輪選舉攻防戰。老實，咁樣彈劾係好難打瓜侵侵也。至於侵侵從敘利亞撤走美軍，任由美軍之盟友庫爾德族人俾土耳其軍隊打到飛起，大佬，真心嘈嘅最多都係當地人啦，美帝選民知唔知影響到選情？冇可能了。依家美帝人民關心嘅係，NBA老細(編按：圖為NBA總裁肖華)即使好勇猛地捍衛言論自由，會唔會因為今次火箭高層撐香港而出事？放心啦，NBA都係睇錢份上，依家分分鐘想緊有乜方法同北方大國和好，你估佢地真係想撐香港？
香港反送中運動之效應，依家先至殺埋身。早幾日香港已經有唔少中產專業兼老細級人士，開離岸戶口，靜靜雞搬錢走。咁佢地搬錢，依家已經唔使去銀行裡面做嘅，響網上搞就可以了。咁平民百姓又點樣？咪去銀行拿錢啦。呢啲效應就係咁樣傳出嚟。部分可以開海外戶口嘅銀行，早就因為太多人，有老友想開戶都俾銀行職員話，今日quota爆晒，唔得矣。
香港中產密密搬錢，因為仔女反正都去海外讀書，依家早一些安排，開定一個離岸戶口，將來有乜風吹草動，走資先。至於移民去邊度？近近地咪去台灣囉。拿住一堆錢去台灣開個戶口，部署定散水去台灣，對30歲上下之青年，何嘗唔係一個好嘅選擇？不過移民去呢，就要識政治，要分藍綠呀。因為送中效應，搞到成個台灣的總統選情，越來越對English Choi有利。
呢個問題都幾有趣：當大家真係settle down，睇清楚佢地選舉之招數，有時真係笑唔出。台灣有電視台整日播Korean Fish，亦有電視台全程跟蹤Korean Fish，日日響度搵機會去踩佢幾腳。老實，睇Korean Fish唔係真係俾某啲名嘴咁樣彈到一文不值，佢真係好努力咁樣埋班。不過今次Korean Fish之支持者，同埋好多運動嘅形式同鋪排，真係仲好老土。即係做政治文宣，係一門專業，而文宣之口味，又好反映出參選人之口味。
Korean Fish之文宣仲係好水皮。好嘅來講，你可以話佢呢方面好貼地草根，但從另一個角度講，中產專業都市區果埋選民未必合心意。香港送中搞到一鑊泡，English Choi真係企響度都有票，Korean Fish又唔可以響香港呢件事上有分加，真係頭痕。你睇：蘇澳橋斷裂墮海，好似都郁唔到English Choi分毫。
至於英國波叔，頭都大晒。但佢不愧係務實主義者。兩個星期前仲拍晒心口有新刁，仲不惜賠上首相之位云云。今時今日呢，同歐盟領袖正式傾完後，發覺唔對路，依家已經話唔介意推遲退歐。喂大哥，當初你話本月底一定可以切，同歐盟一刀兩斷，點解今日當呢個承諾係廢紙，隨時可以轉軚，仲賴死唔會走。真係底線無極限也！
倫敦大學亞非研究學院法律系博士