我媽，走咗十幾年。自此，我一直過著無飯生活，就算過時過節都係出街食，想飲啖湯都冇，所以我係非常羨慕人哋有住家飯食，如果有朋友請我返屋企食飯一定𦧲飯應(會用麥樂雞煲湯嘅工人除外)。
直至喺食友圈得知筲箕灣以無味精住家菜聞名的范太，喺元朗重開范湯皇，終於有機會食番住家飯了。范湯皇新店走私房菜路線，全預約制，暫時只設晚市，所以范太能夠一如既往每朝都親自走訪各大街市搜尋時令食材，清遠雞湖北蛋海蝦海魚鮑魚全部揀手貨，菜式依舊充滿家庭味道，例如蝦仁炒蛋─蛋漿唔會落忌廉呀牛油呀搞嚟搞去，材料就只有蝦+蛋，that's it，食第一啖我有啲眼濕濕，完全係小時候食嘅味道；白切雞─廣東人做雞有好多方法，偏偏我只愛白切，最能夠食到原味，范太用清遠走地雞，肉嫩皮爽雞味重，配黃薑飯停不了口；芝士焗龍蝦─煮海鮮又點會難到佢，邪惡的芝士遇上僅僅熟的龍蝦肉，頓時變成正義的芝士；生死戀─又名馬友友(鹹魚蒸鮮馬友)，新鮮馬友上面加咗塊馬友鹹魚一齊蒸，入口鹹香魚鮮齊來，一生一死非常纏綿。
生死戀
簡單卻很實在的范湯皇，未必係全港最好食的一個，但一定係令我最有感覺的一個。范太，加油！
范湯皇│元朗宏業南街22號虹方地下5號舖│66233698│每位約$300~$500(約六至八道視乎菜式而定)│須預約
同范太集郵是必須的。
ADVERTISEMENT
立即更新/下載AM730手機APP 體驗升級功能
