以前講起寫程式，總覺得係一件「高手」先做到嘅事，要識語法、識邏輯、仲要debug到半夜。但隨住AI技術爆發，寫code嘅門檻不斷下降，甚至唔需要打code，都可以「寫」出應用程式。Manus呢類Agentic AI，正係帶領我哋進入一個全新時代——人人有code打。
Vibe Coding：用語氣開發世界
註：Vibe Coding一詞由OpenAI聯合創辦人Andrej Karpathy提出，形容一種以自然語言與AI對話，達成程式開發目的嘅新模式。佢喺2025年2月公開提出呢個概念，強調開發者可以完全投入直覺與想像，由AI幫你「vibe到啱為止」。
「Vibe Coding」唔係官方術語，而係對一種新形態編程方式嘅形容。你唔再需要開IDE打十行code，只要用自然語言講出你想做乜，AI就會幫你拆解、實現。例如：「幫我整個表單收email，儲落Google Sheet。」
傳統做法可能要前端、後端、API寫晒；而家，用AI工具(例如Manus、GitHub Copilot、Cursor)，幾乎係對住介面講句說話，背後就幫你自動生產前端code、backend API，甚至部署script。
GitHub Copilot早已成為開發者日常工具，可根據上下文自動補全、改寫、解釋程式碼。Cursor更進一步，結合LLM+開發環境，令你可以一邊寫一邊問：「呢段code有冇bug？」「我想轉用Firebase，可以嗎？」AI就即時幫你改。
Manus：唔止寫code，仲幫你諗埋做咩
Manus作為Agentic AI嘅代表，唔單止係「AI打手」，而係「AI拍檔」。佢會主動拆解任務、規劃步驟、整合工具。想做個網站？佢會問你目標對象、功能需求、部署方式，跟住幫你一步步實現。
呢種由「你講vibe」去「佢幫你搞掂」嘅流程，打破咗傳統開發模式。唔識code唔緊要，只要你識表達自己想點，AI幫你兜到盡，真正做到「人人有code打」。
由學技術，到學表達
過去學coding，重點係語法、結構、演算法。而而家更重要嘅，可能係點樣用語言清晰表達你想做乜。講得準、講得好，AI就幫你做到精。
這種轉變，好似將開發權利democratize，唔再限於IT部門，而係開放俾創意人、創業者、設計師，甚至中學生。未來嘅「寫code」，可能唔再係打字，而係講故事——比AI聽，幫你實現。
正如《破壞之王》講：「人人有功練」，今時今日，我哋可以話：「人人有code打」。你唔需要係天才，只要識vibe，就可以成為你數碼人生嘅主角。
未來寫程式，唔再係苦學，而係溝通。AI唔止識你講咩，仲會幫你實現你嘅諗法。你今日vibe到未？