猴年三不買

有一樣嘢真係好唔明，每到農曆年，啲生肖運程書梗係好銷得，全世界咁多人，生肖就只得十二個，咁咪即係唔少人嘅運程係一樣，肯用吓腦都明白冇可能，但偏偏好多人信，有時真係難怪啲江湖術士咁易搵到食。

有朋友幫人寫過呢啲書，佢話只係將以前幾本運程書左抄右抄而成，年年如是。朋友話大家無須太認真，其實好多人都係應吓節睇睇，當係消閒咁啫。既然係咁，Loser都應節，係度送啲所謂貼士俾大家。只不過往今年股、樓、匯都咁差勁，邊有必勝，反而係想提提大家，乜嘢唔好買。

首先今年千萬別買樓，loser重申一直見解，以目前息口走勢仍然低，供樓人士供款項佔入息比例4成多一點，以及發展商手上冇乜負債，唔使心急劈價賣樓，喺咁情況，樓價唔會大跌，所謂大跌係一年跌三成。反而，過咗農曆年後，樓市或許會轉活躍，事關累積咗一定購買力，樓價又回調咗啲，應會有人走出嚟睇睇樓。

然而，樓市活番啲，但樓價要升空間真係冇乜，極其量再彈少少，一旦購買力消耗，樓價又會回軟，想置業者千萬唔好咁心急，寧可租樓住多一兩年都冇壞，唔好相信啲人話長住唔怕買貴嗰啲廢話，你要明白買貴咗，供都供得辛苦過人，仲要個個月俾息㗎。

第二唔好買就係人仔，你睇啲大鱷都開到聲話人仔唔掂，即使佢哋出口術，你都唔好掉以輕心。雖然爺話大鱷唱淡人仔搵食，仲強調中國經濟基調良好，人仔唔會大插，但類似呢啲說話，馬來西亞政府喺亞洲金融風暴夠係咁講，香港97時咪又話啲人唱衰香港，批評摩根士丹利係二流分析員，政府咁高調反駁，大家仲要小心啲。總之人仔就寧可沽都唔好揸，免得輸身家。

第三樣唔好買就係啲大陸高息債券，點解？你諗吓大陸經濟今年肯定冇運行，加上美元升人仔跌，資金外流，過去啲公司發行嘅高息債而到期還人仔，變相要還多咗。即使美國加息幅度同步伐唔大，整體都係朝加息方向走，若然中國經濟下行幅度大，樓市又冇起色，真唔排除有公司俾唔到咁高利息而被迫變壞賬，大家睇睇啲高息債券基金價格一直向下調，就知走向，今年都係少沾手為妙。

總之猴年三不買，「一不買樓、二不買人仔、三不買大陸高息債」，記住，你唔買最多只係走咗個機會，但買咗就面對高風險，有乜差池輸鑊勁就難翻身。