西九故宮博物館的興建引起掀然大波，矛頭直指林鄭，話佢冇公眾諮詢，又話冇招標就俾嚴迅奇設計，係利益輸送。
其實喺西九起個博物館，以故宮為主題，並沒違背西九文化區的發展原則，又唔係起間夜總會或者殯儀館，即使唔諮詢又有乜大問題。
說穿了不外乎兩個原因，第一當然係政治喇，你林鄭想用呢件故宮A貨嚟攞分，我就要搞你，況且批評者用到公眾諮詢呢樣嘢，必定可以站於道德高地，冇人會話佢錯，至於實際情況係咪一定要諮詢，話之你。另外，有啲人就覺得，你沒問問老子意見，他媽的就係唔俾面，你唔俾面我就俾啲顏色妳睇睇。
有時真不明白，難道社會上事事也要諮詢，起個博物館，若然公眾諮詢，要花幾個月時間，然後有好多人意見多多，拖吓拖吓又唔見幾個月，分分鐘有心人搞嘢，爭論一輪都唔知拖幾耐。好喇，之後又話比賽招標，咁又搞你一年半載，整整吓一項工程不知何年何月先落成。
雖則你會話，《西九文化區管理局條例》第19條寫到明，西九管理局須就發展或營運文化設施時，「在該局認為適當的時間，藉該局認為適當的方式，諮詢公眾」。但正如林鄭話，要得到相關機構批准，涉及中央、有關部委、國家文化部、故宮博物院，如果要諮詢，有一方面話唔同意，就會產生非常尷尬嘅局面。
我也相信事實如此，有時跟中國政府溝通，不能事事以我們港人自我中心，雖要協調互量；況且蓋一個故宮博物館，讓人認識更多中國文化，又不影響香港經濟民生，無必要太上綱上線。再講19條亦明言，以該局認為適當時間及方式諮詢，咁呢方面都冇話違咗規。
搞個博物館都可以引起咁多爭議，香港未來要發展真的很困難，因事事都被扣帽子，邊個夠膽去發展？去建設？為官者都係多一事不如少一事，少做少錯為妙。