大陸股市跌到一仆一碌，上証綜指由高位計，蒸發咗超過三成，能夠喺無金融危機情況之下(我指係無銀行倒閉、無貨幣同其他系統風險等等)，大陸股市可以跌到七個一皮，自己親手去製造金融危機，的確係令我等淡友拍案叫絕。
依家回帶睇番近一個多星期市況，阿爺由減息降準開始，幾乎日日有招出，而個市就愈救愈墮落。好多人都解釋過呢個原因，我諗最簡單咁講，就係一個人只係普通傷風咳，醫生都唔會要佢食類固醇醫治，梗係心肝脾肺腎都有問題，醫生先會落重手去醫；大陸股市一樣，阿爺早就知道A股個底子唔好，但中國經濟唔掂當，靠外貿、消費、政府開支都難以維持經濟增長，唯有就係谷起股市製造泡沫，依賴呢個泡去托住微弱不堪嘅經濟，到個市跌，就類固醇、特敏福乜藥都一齊去醫。
個市本身係鱷魚頭老襯底，除非阿爺講明包底，否則由佢自由行就一定係Free Fall，所以阿爺之前救市招都係無用。其實仲有一點係大家忽略咗，就係「自私」心態。
「借問聲炒股票邊個唔係自私？」Well，我諗呢個毋庸置疑，但香港我地都仲見到一班死硬Fans，好似曾淵倉長期持有長實股票、張華峰係港交所大好友等等，就算股價長期不振嘅匯控，每到緊要關頭都一定有大把血肉長城。但中國股民呢？個個聽消息短炒，個個都想做Louis Yan，用10萬變100萬返嚟。最大嘅問題係，佢成副身家有50萬，佢就真係用足50萬去借多幾百萬去炒，一有事上來畀人斬倉就渣都無，咁不負責任去買股票，同日日買大細有咩分別？
最自私唔係股民，係中國政府，一手炮製呢個大泡沫，依家收唔到科仲要券商齊齊科水去救市，講到尾佢地要護市嘅心態只係維穩，你估佢真心想個個人都賺錢咩！