啟德地皮剛以天價成交後，又傳（1658）郵儲銀行以3百幾億洽購長實（1113）棟中環中心，雖然郵儲銀行否認，但估計呢幢大廈遲早成為大陸財團囊中物。近兩三年大陸佬透過政府土地招標掃咗香港嘅土地接近千億元，又密密收購整幢商廈，之前恒大（3333）以125億向劉鑾雄間華置（0127）買入灣仔美國萬通大廈，中國人壽（2628）以45億向會德豐買入紅磡One Harbour Gate，光大（0165）亦以100億購入灣仔大新金融中心，呢啲收購真係唔多尋常。
若然大家有細心留意，唔單止地產市場係咁，金融市場更嚴重，昔日本地幾間最大證券行好似大福證券、新鴻基金融，已先後被海通及光大收購，其餘敦沛、華富國際又喺最近易手；銀行亦陸續落入大陸佬手上，好似招商銀行（3968）收購咗永隆銀行（0096）、越秀買入廖創興（1111），總之有放盤嘅，大陸佬都唔放過。
康泰星晨永安變身大陸公司
若你以為大陸佬只係控制金融地產就滿足，咁就錯喇，喺你生活上幾乎每個環節嘅企業同公司，已經逐漸落入大陸人手上，全港最大電視台電視廣播（0511），已經係由大陸梅鐸黎瑞剛話事，最大嘅鬼報SCMP，亦由阿里巴巴老闆馬雲控制，依家市場最大嘅財經網，其實背後亦係內地財團揸住。
交通上，香港四間航空公司國泰（0293）、港龍、香港航空、香港快運，後兩者雖則有香港兩個字，實際跟香港人一點關係都冇，十年前由內地海航集團收購，股東雖則有香港人，只不過係掛個名做個樣。
你話要去旅行，港人最熟識嘅旅行社不離永安、康泰或係星晨，但我可以話俾你知，永安俾大陸個旅遊網站攜程買咗，康泰亦落入香港航空手上，至於星晨旅遊，冇耐前亦被大陸房地產商花樣年（1777）收購。
富臨譽宴惟膳盡落大陸手
好喇，你想去飲荼食嘢，原來都係幫襯緊大陸佬，富臨（1443）、譽宴（1483）喺今年先後易手，買家都係內地人，至於旗下有Italian Tomato、銀座梅林同炎丸間飲食代理集團惟膳（8213），亦都賣咗俾內地財團，即使荼餐廳翠華（1314），最近賣盤消息傳得甚囂塵上，準買家據聞都係大陸佬。
你睇睇吓，發覺食、住、行呢幾項必需事項，原來已經悄悄落入大陸佬手中，而呢個趨勢怕且唔會停止，未來好肯定陸續有企業賣盤，中國政府透過經濟手段去控制香港，所以話你港乜獨（先至聲明，我係唔支持港獨，畢竟我都係中國人），不出十年，香港經濟命脈將全部掌握喺強國人手上。