中國證監會主席劉士余早前一句門口野蠻人，直斥有人藉不明來歷的資金進行槓桿收購，對社會經濟有不良影響。劉士余一出聲，啲險資收購即時偃息旗鼓，鳴金收兵。
野蠻人唔敢喺內地放肆，但呢股野蠻之風竟吹到香港，風眼仲係地產。唔係咩，海航天價搶啟德地無耐，合景泰富（1813）跟龍光地產（3380）竟以每方呎樓面地價兩萬二搶咗鴨脷洲塊地，若連建築費，起碼要賣3萬先有錢賺，塊地其實好近海怡半島，投地個一刻，海怡呎價都係賣緊萬五蚊，若然咁計，幾年後樓價要升一倍先封賺本門，簡直唔知條數點計。
香港地產商冇碇企？
雖則話兩家公司資金唔係來歷不明，但以佢哋每間市值都係百零億計，去投一塊地王，肯定有點吃力。對於大陸佬癲價搶地，香港發展商頗為頭痛，事關咁搞法，佢哋要增加土地就變得十分困難。怪不得新鴻基地產（0016）老細郭炳聯都好無奈，話等大陸地產商搶到夠先喇。
市場就有聲音，話香港地產商將逐漸要讓位，以後香港地產係大陸佬話事。呢場中港地產商嘅戰役，Loser一啲都冇為港燦發展商擔心，事關佢哋手上土地儲備十分充裕，等閒有過千萬呎，以香港咁細地方，大陸佬點搶都好難跟本地啲大孖沙去較量。
負債低土儲足
雖則你話香港地產商每年賣好多樓，以目前情況，倘若持續搶唔到地，4年後隨時乾塘。不過大家忽略咗一點，大陸佬將地價搶高，香港地產商手上嘅土儲即時水漲船高，喺樓價大升下，佢哋每年賣樓數量即使下降，收益亦未必會減少。換言之，香港地產商可以將土儲拖慢嚟賣，即係話本來賣4年冇晒，今天可以拖到7-8年，亦唔會影響佢哋嘅利潤。
好喇，喺呢段咁長時間，可以發生好多事情，利息上升，經濟放緩，以及香港土地未來供應有機大增，大陸佬面對好多風險，一個搞不好，資金鏈有問題，唔好話搶地，要賣地都唔出奇，香港地產商勝在負債低，有足夠實力同佢哋打一場消耗戰。
唔好忘記，香港大孖沙手上咁多農地同舊樓，雖則更改用途需時，但呢啲優勢係大陸佬拍馬都追不上。