大減價後遺症

上星期日行中環，本來打算去平日很鍾意去的英國百貨公司買嘢，但最後都係唔去。因為在三個月前，我收到一個由百貨公司發出的短訊，憑著短訊去買嘢，可以有七五折，我以為是講笑，或者有設限，原來是真的，沒有設限，買任何貨品，買幾多都可以，我於是買了很多。不過，自此之後，我冇再去那一間百貨公司買嘢，因為我覺得，如果我買了之後收到短訊，豈不是很蝕底，我寧願等收到短訊才去買。 

有不少人認為，生意唔好，減價是促銷不二法門，老實說，的確如此，不過，當回復正常價格之後，生意往往會更差，據聞，曾經將叉燒飯減到10蚊盒的舖頭，在回復正價之後，生意大幅減少，因為去買叉燒飯的人會覺得，用超過一倍價錢買以往10蚊可以買到的叉燒飯，認為老闆很暴利，寧願幫襯第二間，大幅減價的老闆未必知道這個後果。 

有人話，真係唔知點解，近排執笠的舖頭比疫情的時候仲要多。其實，這也是大減價之後遺症，在疫情的時候，不少舖位業主與租客共渡時艱，大幅減租；在疫情之後，租金回升，但租客唔適應，認為業主暴利，寧願執笠唔做生意。其實，一個食肆舖位租金，在疫情前佔營業額15-18 ％，最近則佔13-15 ％，已經為租客創做了一個良好營商環境。但租客仍然話太貴，寧願唔做都唔租，業主都冇辦法，有零售協會主席叫業主大幅減租三成，而事實上租金所佔主席那個行業的生意額1.2%，以往是2-3 ％，仲要大聲疾呼叫減租，真的是無話可說。其實，不少業主寧願個客唔租，他們可以用市值租金將舖位再租出去，市值租金往往大幅高於現有租金，租客其實是受到疫情時大減租所累，認為現在租金太高，寧願唔做生意都唔租。不過，姣婆守唔到寡，租客很快就會再租一個租金仲貴，地點又冇以前咁好的舖位做生意。