【網上圖片】
樂視網老闆賈躍亭黯然下台，孫宏斌將擔任主席，對於樂視來說，老孫做掌舵人，是禍是福暫時未知，但起碼可以有個轉機；況且老孫喺商場打滾多年，經歷無數戰役，起起跌跌，證明佢有頑強鬥志，大家做花生友，睇睇佢搞唔搞得起樂視。
孫宏斌廿零歲已經喺聯想（0992）做到高層，更加係中國電腦教父柳傳志嘅左右手，點知老孫年少氣盛，覺得好叻，有傳佢想取柳而代之，結果死𡃁仔俾老師傅打敗，仲涉及商業犯罪而鎯鐺入獄，坐咗足足三年。事後好多人說，若沒有這事情，今天帶領聯想的就是孫宏斌而不是楊元慶。
從天堂到監獄
由天堂跌到監獄，一般人都玩完，點知老孫出獄後非但冇俾人睇死，仲創出人生第二高峰，就係做地產中介。錢從何來？呢個就係精彩地方，老孫竟說服到柳傳志俾錢佢喺天津開咗間順馳，可想而知老孫把口幾掂。口才掂，做經紀自然得心應手，順馳愈做愈大，以老孫性格，又點甘心做一個經紀，佢將資金投入房地產，一於做地產發展商。
做吓做吓又俾佢做到有聲有色，老孫係狂人，喺地產市場瘋狂買地，04年博鳌論壇時，跟萬科老大王石論戰，老孫豪言當年可以賣過百億樓。點知往後幾年中國樓市出現拐點，順馳資金鏈幾近斷裂，無可奈何下，將公司賣咗俾香港上市公司路勁（1098）。
一係入一係唔入
你以為佢玩完，點知sorry喇，佢留有一手，剩低間私人公司「融創」，仲有幾塊地。09年中央4萬億放水救市，令老孫可以藉機翻身，跟著走到香港上市，拿到資金，又再瘋狂買地；呢鋪個結果點，唔使講大家都知，中國地產市場係咁直線上升，買得大自然贏得多，融創快速成長，擠身大地產商之列。
熟知老孫的人也知道，當佢求別人時，可以好低聲下氣，放下身段做矮仔，到佢成功時，又好意氣風發，不可一世；佢好有賭仔性格，敢於去博，唔怕輸，即使輸咗，也有打不死精神，永不言敗。樂視由佢領導只會有兩個結果，好似黃興桂講十二碼：「一係入一係唔入」，即係點？樂視一係就贏到開巷，一係就破產收場。