本港樓價持續上升，令不少人難以上車。(資料圖片)
永恆的亞視復活後，搵了施永青老闆同埋我呢條廢青，上訪談節目講世代買樓問題。鏡頭前的施老闆比較親民和善，跟辛辣的文筆觀點相映成趣。節目後施老闆駕車送我離開大埔，多了一點交流，我也請教了他一些創業意見。
節目主持有既定結論，他們覺得年輕人上唔到車，買唔到樓係歸咎於個人問題，例如唔使太急，錢搵夠就會有之類，是很中產、中年人的勝利者主流論調。我是忠於自己年齡和階級的人，很難同意及和應他們，不過，節目氣氛也不適合面紅耳熱的討論，唯有轉一轉方向。
樓價貴係事實，樓價和入息供款能力之間的佔比，也是客觀數據。睇唔睇到，或者有無選擇性去睇，是另一問題。年輕人買不到樓，既有自己問題，也是社會問題，即使有錢如施生，也不能否認純是年輕人問題。
香港由低樓價時代，發展到現在大都會格局，這是政治、經濟大趨勢的轉變，我無話可說。樓市辣招是政策問題，即使年輕人賺錢能力有幾高，都避唔開。因為二手盤源被凍結，所以只能去買新樓，新樓選擇較多嘛。
然後，到你買新樓時，又要做壓力測試，首期無得好似以前借九成，當然係政策問題。你很難歸咎年輕人自怨買唔到樓，純為自己本身能力問題。咁二十年前真係無辣招、有得房貸做九成以上喎。建築成本是梗數，但對比一下呎樓，之間的溢價算高定低，真係有數得計喎。
主持之一楊立門係政務官出身，他質問我：「如果我入政府，你會點做。」我不假思索答：「改組城規會。」他有政策歷練，仲要做過城規會，自然知我講乜，施生也豎指讚好。
開發郊野公園，一定要面對環保團體壓力，你搞乜貨櫃屋、首置上車，都不及你把城規會限制的土地釋放出來咁有效。現有的城規會，改變土地用途要過五關，斬六將，等到規劃出台，我都變叔叔了。當中的既得利益角力，嘿嘿，都不是容易處理呢。
施老闆才思敏捷，節目內我第一句問施老闆：「幾時加稿費？」「幾時都得，你寫得好的話，我調轉頭要留你啦。」言下之意，即係我寫得不夠好？「不過，你喺我度寫了兩、三年都無俾人踢走，都算寫得唔錯。」紙媒版位競爭大，真難捉摸啊。