招股書封面的證券行代表甚麼？

金融科技(Fintech)呢個字，政府吹太勁，一般人先入為主都係覺得跟支付、P2P或虛擬銀行等應用相關，其實股票證券都有fintech的應用部分，比較多嘅係做分析工具。

例如新股是很多fintech項目想開發的部分，之後撈埋Big Data等概念應用，可以吹到天花龍鳳，不過，方法學和財經知識就出了問題。其中一個常見謬誤，就係過分強調保薦人的功能，然後單從保薦人的往績去推論新股的走勢，佢對於其他新股上市的角色沒有充分理解。

有時睇招股書，見到一串專業用字，行內人都未必知道邊個打邊個，財經記者更甚。

保薦人是新股上市的「奶媽」角色，未有甚麼「聯席帳簿管理人」、「牽頭經辦人」、「包銷商」等之前，保薦人最早會出現，負責文件、上市聆訊、盡職審查、律師會計專業人士初步協調等一堆routine又麻煩的工作。

在細股的世界，因為上市公司資源和知識不足，很信保薦人，所以保薦人通常有很大能耐去推薦御用的財經公關，做路演、搞媒體關係等。這是「需求面」的操作，保薦人比較可以幫助到股價的職能，在乎佢能否找到一個合適的財經公關。

至於招股書常見的角色，如「聯席帳簿管理人」、「牽頭經辦人」、「包銷商」等，在大隻新股上市過程中，內裡會有仔細的分工。「聯席帳簿管理人」當然係大粒，話事權相對大一點。不過，在細股角度，當中的分別並無大股咁大，分工無咁細，大致上都係處理「個餅點分」的問題，包括定價或者「分餅」的人有無異樣，係咪關連人士等，都係佢哋負責。這是「供應面」的操作，就是這班人去處理。

有時好像「牽頭經辦人」呢類角色，往往有點名過其實的感覺，倒是有點像幫證券行賣廣告一樣。試想想，好像幾個月前那些超級新股浪潮，甚麼眾安在綫(6060)、易鑫集團(2858)、雷蛇(1337)、閱文集團(772)之類，通常用的都是星光熠熠的bulge bracket國際級投資銀行。

如果可以在招股書掛個名，做個「牽頭經辦人」，跟超級大行並列，都係另類面上貼金，方便之後搵生意。
最後要解釋一下一個上市關鍵角色叫「全球協調人」，通常係大隻、暢旺的新股會見到呢個角色，因為喺理論上，香港上市的新股係接受全世界各地認購，所以就要有「全球協調人」去負責海外投資者部分。

不過，站在細股立場，呢個角色係多餘，細股鬼有海外投資者咩。咪又自己本地友，再夾內地友一起玩，真係咁多外國投資者對香港細股有興趣咩。