十幾年前，合和(0054)主席胡應湘唔滿意分析員對公司看法，於是叫佢哋「Bloody分析員」，有一陣子，恒隆(0101)主席陳啟宗亦曾覺得啲分析員未夠水準而發悔氣話：「佢咁叻，叫佢坐我個位」；但咁多年從未見過有公司趕分析員出場，仲要係由首席財務官(CFO)咁高層出面。
上周百富環球(0327)CFO怒趕分析員一幕，成為中環熱話，見微知著，即使百富環球(0327)份中期業績穩定，但Loser肯定唔會買佢股票，事關投資股票睇中長線，公司咁處事，長遠隨時出問題。
危機處理教人懷疑
堂堂一個CFO，可以咁冇EQ同咁唔大體，我會問點解？有理由相信呢個係公司文化，啲高層啱聽就冇嘢，稍為有啲唔順耳嘅聲音，唔接受不特止，更會大發雷霆。喺咁環境，試問公司員工或有能之士，又點敢開口建議，最後係人人揣摩上層喜好，錯咗都冇人出聲，呢啲公司點會有進步。
好喇，推展到業務往來，你會諗公司係咪對客戶都係咁？即係話啲客有唔滿意向公司反映，佢會唔會咁回應：「唓！啲友都唔識嘢，我哋啲嘢咁正，唔使理佢。」以呢次處理分析員手法，有可能對客都係咁傲漫無禮，唔願意改善，長遠睇肯定會得失客戶。
仲有，一間公司唔會永遠順風順水，倘若有危機出現，佢哋有冇能力應付，我真係好懷疑？今次分析員寫你唔好，都唔係好大件事，你咪嘗試去解釋，又或加強溝通，點解要強硬到打走佢，可見公司處理危機嘅能力同情商都十分之低，未來若碰上大問題，真係擔心佢點處理。
身有屎怕俾人踼爆？
再諗衰啲，CFO點解會咁唔大體落到台趕人走，Loser諗係咪公司真係有問題，所以個高層先會咁大反應，否則你盤數都叫做有交待，使乜嘢咁動氣；你咁介懷，梗係有啲嘢俾人講中，公司先至咁驚，怕嗰位分析員喺會議中問吓問吓，連其它出席者都察覺留意到，咁到時咪好大劑，於是防範未然，先將個禍源剔走，以策萬全。
事後個CFO發表聲明，話唔係因為對方批評公司差而唔接受，而係希望分析員就事實部分要盡責，要認真。究竟個分析員認唔認真我唔敢講，但Loser睇返今年4月麥格里份報告，給予百富環球「跑輸大市」評級，目標價係6個3。當時百富環球股價大概7個幾，4個月過去，上周收市報6.61元，明顯個價都幾符合麥格理預測，相比其它分析員個目標價8至10蚊樓上，麥格理預測都幾準，當然目標價睇一年，我地咪又睇睇8個月後百富環球個股價點囉。