近年發展商增建啲蚊型單位，細到得嗰百零兩百呎，唔少人罵爆發展商無良，政府甚至話有需要時要規管。
你說要立例唔俾起納米樓，只要細心諗諗，係倒果為因。何解發展商會減少興建大中型單位，改而大幅增加細樓比例，好簡單，市場有呢個需要，否則在商言商，發展商又點會胡亂興建，浪費可以賺錢嘅土地儲備。
樓價爆升的結果
納米樓嘅出現，係因為近年樓價不斷標升，將市民嘅負擔能力愈拋愈遠，幾年前一個五百呎單位賣3百到4百萬，今天要賣7百到8百萬，你話一般打工仔點供得掂，特別啲年輕人，又想做業主，但又冇經濟能力，咁可以點？
於是乎啲發展商咪諗，要將個整體銀碼變返3百萬，最可行咪將單位面積縮減，咁啲人咪又可以上車囉。當然，你可以話啲發展商賣平啲咪得，但你諗諗，發展商唔係慈善機構，係講利潤，你叫佢賣平啲，簡直與虎謀皮。
納米樓係樓價急升必然結果，大家睇睇東京，唔少單位都係得百幾兩百呎，點解？就因為80年代日本泡沫經濟，樓價暴升，要置業隨時需供3代人，好多人冇能力買樓，結果發展商咪唯有起啲蚊型樓。
可以選擇唔買
香港情況如是，你話立例規管，好喇，發展商唔起啲樓仔，轉而起番啲中型又或300到400呎單位，但樓價仍然持續高企，一般市民根本都負擔唔到，有樓都買唔起。
至於你話發展商係咪好無良，咁樓市係自由市場，只要唔存在欺瞞，你見層樓咁細，你可以選擇唔買；但其實有啲人係寧可住細啲，只要上到車就心滿意足，咁納米樓又真係可以合符佢地所需。
要杜絕納米樓，最佳辦法係從樓價著手，即係又走返入個老問題，就係要增加供應，呢點真係要靠林鄭諗諗計。