某間證券行搞個模擬炒股比賽，結果有個阿婆靠沽期指贏咗第一名，將100萬本金炒到52億。你驟耳聽簡直有點匪夷所思，據間行的官方答案，阿婆係喺上月英國脫歐時，港股暴跌1300點，狂沽期指而成為股王。
網上唔少熱烈討論，有人質疑阿婆幾廿歲，點識上網操作期指，證券行又懶神秘，話個婆唔想接受訪問公開炒贏股神嘅秘訣，如果你上間證券行個網睇睇阿婆幅相，我真係有理由相信網民嘅質疑。
坦白講，Loser認為係市場宣傳多於一切，先唔好講阿婆識唔識炒期指同操作電腦，以100萬本金，要點炒先可以贏到52億，真係好想聽聽間行講講。
100萬本金，頂多可以買十幾張期指合約，當天港股暴跌1300點，一張合約咪賺65000蚊，咁你最多賺到一百幾廿萬，即使你期間出出入入，不斷贏錢而加大合約，點會贏到咁大數額現金？如果間行真係叫到阿婆出嚟講解，即使要俾過千銀入場費，Loser都願意去聽聽。
至於現實生活，更加冇可能贏到，事關投資唔係講IQ，反之心態最重要，若然要真金白銀攞錢出嚟，你點會咁夠膽一舖All In，呢啲係電影先有嘅橋段。再講，即使你夠擔將所有錢沽注一擲，股市起起跌跌，過程中你點克服你嘅恐慌，稍為有錢賺，你都平倉離場，點可能不斷累積沽貨賺到盡。
模擬炒股能夠贏，精要係一個「博」字，例如要買啲神仙股，又或者係窩輪，博佢一舖爆上，升幅可以好驚人，況且呢啲係紙上炒股，輸咗冇所謂，反而你買藍籌，想贏幾乎冇可能。
但換轉係現實生活，點可能會咁博，你有幾多注碼，一次失手就玩完喇。當然，現實生活都有極少數人係咁，當中亦有人贏有人輸，但實際情況係中嘅隨時1個，輸嘅係9個。