香港迪士尼去年入場人次下跌至680萬，內地客跌到279萬，結果樂園蝕1.48億。
上海迪士尼上周開幕，唔使講大家都會估到有乜發生，咪又係中國特色嘅場面，強國人爭先恐後搶入閘，排隊玩遊戲時霸占搶位時有發生，至於啲小孩隨處疴屎疴尿，一如預期冇令大家失望，傳媒爭相報道，唔少港人睇完好心涼，笑住話：「呢個咪上海迪士尼囉，搵你去喇！」
作為香港人（Loser喺香港出生，港英時代接受殖民地教育，係百分百本土人，並唔係啲強國人攞咗香港身份證，扮香港仔然後猛叫港獨），我可以跟大家講，上海迪士尼仍然會有無數咁多強國同胞蜂湧購票，事關你笑啲卡通人物係山寨版，唔少強國人話有中國特色，你話好辛苦要湧要排隊又有人霸占，神洲大地你話邊個旅遊點唔係咁，強國人都習以為常，既然度度要迫，點解唔㨂個講出嚟都威啲嘅地方，你話去過迪士尼定話自己去過萬達樂園威呀？
隨地大小便都唔係新聞
至於小朋友隨地大小便，大人周圍吐痰，喂！新聞唔使大肆報道啦，呢啲事情喺強國時有發生，已經唔係新聞喇；即使好多強國人都會批評，但佢地唔會因為咁而唔去，事關喺內地，佢地都預咗，唔會覺得好大件事。
既然係咁，以上海迪士尼規模及位於國內最繁榮城市，香港迪士尼肯定會被搶走大批客源，喺處想大家睇睇以下個表：
香港迪士尼業績表現
年度
2015
2014
2013
2012
2011
總入場人次(萬)
680
750
740
670
590
內地客人次
(萬)
279
360
348
302
266
內地客佔比
(%)
41
48
47
45
45
盈虧
(億港元)
-1.48
+3.32
+2.4
+1.09
-2.37
酒店入住率(%)
79
93
94
92
91
資料來源：迪士尼公布
香港迪士尼2005年開業，蝕足6年，到2012年先賺錢，點解賺錢？我哋倒片睇返2012年時任迪士尼行政總裁金民豪講乜，佢話隨著高鐵陸績開通，進一步開拓內地遊客市場將成為香港迪士尼樂園策略重點，佢仲話：「我哋期望在內地市場的支撐下能夠儘快實現扭虧為盈。」
簡單理解，迪士尼能否賺錢，內地遊客人數同消費係關鍵，不妨又睇睇吓數據，2011年迪士尼入場人次590萬，內地人達266萬，虧蝕2.37億；到2012年，入場人次提升至670萬，內地客達302萬，迪士尼即首嘗賺錢滋味，錄得1.09億盈利。之後入場人次陸續上升，到13年達740萬人次，當中內地客上升至348萬，該年盈利2.4億，14年達到入場人次750萬，該年盈利創出高峰達3.32億元，內地客達到360萬。
到舊年，入場人次下跌至680萬，內地客跌到279萬，結果樂園蝕1.48億。單睇呢幾個數據，心水清者都會知道，迪士尼賺蝕，入場遊客起決定性作用，而當中內地客大跌係入場人次插水主因。當內地客少咗，酒店入住率由過去9成幾跌到舊年唔夠8成，亦導致收人大跌。
成也強國敗也強國
喺自遊行高峰已過，好多人又嚟過香港好幾次，本地吸引力肯定大減，以前有啲人可能會因為香港迪士尼而嚟玩玩，然後向隔離左右同親戚朋友炫耀一下，而家上海迪士尼開業後，更加唔會特登為迪士尼走到香港。
我哋又聽聽香港商務及經濟局局長蘇錦樑講乜：「上海迪士尼與香港迪士尼定位及客源並不相同，上海迪士尼主要針對內地旅客，而香港迪士尼的定位是國際旅客。」
蘇錦樑真係擘大眼講大話，上面一大堆你睇到頭暈嘅數據已話俾大家聽，強國人係決定香港迪士尼賺蝕關鍵，當年金文豪亦直認不諱，更視之為成敗；至於國際遊客，嘥氣喇，睇返過去幾年，國際遊客都係百四五萬人次，一來好難提升，二來從量嚟講，根本冇得跟大陸人比。
咁喇，講多無謂，大家咪睇吓香港迪士尼未來幾年業績係點囉！