前法國球王施丹帶領嘅皇馬，上仗主場輸俾唔入流嘅艾拉維斯後，對球隊當前嘅困局解釋唔到。其實喺疫情陰魂不散之下，唔只皇馬，大部分強隊五勞七傷；主力球員應付各項賽事疲於奔命，跟對手實力大為拉近，又冇主場威力，12月依然會係列強嘅黑日子，歐洲5大聯賽今季好有機會出現唔少新王者。以上季歐洲5大聯賽冠軍，對比同期成績為例，除咗衛冕歐聯嘅拜仁喺德甲分數上仲勁過上季之外，其餘利物浦、祖雲達斯、皇馬同巴黎聖日耳門(PSG)全線下跌；當中利物浦10場聯賽過後對比上季同期少7分，不再無敵。另外，祖雲達斯同皇馬喺聯賽排緊第四，以皇馬表現係「5大」最差，今屆聯賽得勝率只得五成，佢嘅國內死敵巴塞隆拿仲差，勝率不過半，西甲今屆爭霸變數最大。再睇番歐聯成績評估各大聯賽今季水平，意甲國米、法甲雷恩同馬賽分組賽包尾；法甲水平低，PSG喺聯賽點hea都得，但如果明晚歐聯敗走曼聯，出線即告急，遇上有神勇叛將卡雲尼壓陣嘅曼聯，PSG呢場惡踢。
日報