以為歐聯分組賽無乜睇頭，點知摩連奴嘅毒性迅速運走紅魔全身，今晚曼聯喺主場鬥華倫西亞，突變球壇焦點，大家都好似等緊施丹上場，幫手排毒。英超頂級球員薪酬愈推愈高，又唔易請走，變相成為領隊或者高層嘅催命符。計現今5大頂薪英超兵阿歷斯山齊士、哈利卡尼、奧斯爾、保羅普巴及奇雲迪布尼，值呢個人工嘅得哈利仔。
摩佬呢三季花咗曼聯超過3億英鎊擴軍，期間只攞過兩個盃仔，壓力必大；可惜跟咗佢十幾年嘅得力助手費利亞離任之後，佢同球員嘅關係惡化。排陣亂嚟，一時用安達靴里拉打中堅，啱啱轉3人防線由麥湯米尼孭鑊；法國世盃英雄保羅普巴自負，亦唔肯做代罪羔羊；另一法兵安東尼馬迪爾食緊花生，等新波士上場再搏；「情變男」阿歷斯山齊士，就直頭謝晒。睇怕摩佬一日唔走，班曼聯叛兵都唔肯再搏命，咁啱華倫西亞近排回勇，陣內三線法兵加美路、高基連同莫達迪亞卡拜，近排出場華倫都未輸過。摩佬命運，今晚由一班法國人打骰。