有冇試過玩飛行棋被打回頭，要重新起機？之前行咗幾遠都唔算數，要由零開始過，一定頹爆啦。1860慕尼黑喺德乙升降班附加賽次回合，主場淨吞雷根斯堡兩蛋，兩回合輸1比3，來季要降落德丙。主場球迷當下接受唔到，嬲到猛扔嘢落場又拆觀眾席啲凳，搞到在場有10名警察受傷，4月先上任嘅前利物浦行政總裁艾爾，亦立即辭職走人。1860其他梯隊，包括U16、U17、U19同U21，亦無一例外齊齊降班，真係慘到極點。1860喺六十年代曾經有過輝煌歷史，1965年殺入歐洲盃賽冠軍盃決賽，翌年更稱霸頂級聯賽，但自從喺2004年由德甲降班之後，就冇乜起色，依家仲跌埋落丙組，唯有由低再做起啦！
