辛苦大隊長

世上稱得上真正球星唔多。喺場上競爭激烈，體力化兼大利整體戰主導下，隊長個人表現能夠符合球會上下期望，場外幫隊友做下傳聲筒，場內開波前圍圈說幾句振奮士氣嘅例話已叫克盡己責；但要真正提升大軍比賽中潛能，激發高昂士氣，球王美斯同C朗之後，喺頂級球壇鳳毛麟角。

英超雖然堅持大軍名單要有相當數目嘅本土球員，但英格蘭籍隊長只佔極少數，Big Six中只有車仔列斯占士係三獅兵亦叫各方面稱職；一哥阿仙奴隊內唔分大細，出場時間唔穩定嘅挪威人奧迪加特影響力唔高。Big Six以外，升班馬新特蘭請到格列沙加盟並冠以隊長臂章，呢位跑慣江湖嘅激情真漢子，幫到全隊士氣升級，啱啱場波有傷缺陣，黑貓好似散晒輸俾鎚仔幫，可見佢係場內嘅影響力。最辛苦嘅英超大隊長可能係熱刺嘅基斯甸羅美路，近期場場入波，喺隊中嘅勢力大過主帥法蘭克；如果熱刺明晚歐聯作客法蘭克福有乜差池保唔住前八直接出線，羅美路隨時會係加盟3年半以嚟，見證到第三位人頭落地嘅熱刺領隊。