如果意甲全軍覆沒

自1992年歐聯成立後，意甲球隊從未缺席16強，今明兩晚要望三強爭氣保住意甲名聲。根據歐洲足協聯賽排名系數，意甲僅次英超排名第二，但單計今季暫時所得積分，意甲跌至第五；其實上屆除咗國米攞歐聯亞軍，另外3支參賽歐聯球隊咁啱喺淘汰圈全部收工，到咗今屆嘅意甲代表祖記、國米同阿特蘭大首回合全敗，仲起碼淨輸2球，上屆意甲冠軍拿玻里更喺大聯賽已出局，羅馬喺歐霸排名第8，聯賽護級中嘅費倫喺歐協聯附加賽奮戰中，呢張歐戰中期成績表，已反映意甲喺歐洲真正實力。翻盤要靠射手，但祖記上周中首回合要用美國人韋斯頓麥堅尼推前打箭頭、阿特蘭大靠喺英超撈唔掂嘅施卡馬卡撐住；喺聯賽超班嘅國米，今晚要靠新仔箭頭比奧艾斯保薛圖擔大旗，強隊冇真正射手。意甲未來可能要落喺上位中嘅異軍科木。

若果意甲喺歐聯全軍覆沒，唯一值得安慰係土炮可專注下月尾為國出戰世盃外圍賽附加賽對北愛；只因藍軍連續3屆缺席世盃決賽周嘅話，先係意國球壇嘅真正災難。