英超叢林法則

叢林法則弱肉強食，適者生存，喺英超就係要生存搵大錢，傳統強隊都未必一定識玩；只見剛過去嘅冬窗轉會，中下游球隊動作更多，有啲簽新星博點石成金，有啲要周圍搵即食前鋒救亡，唔會諗咁長遠。

英超好睇只因場內唔係最大最惡，往往有意外嘅賽果；但場外當然有錢話事，唔少黑馬上位即被強隊煎皮拆骨，近年最經典係李城，不斷賣走主力，替補者又上唔到位，弄得一屁股債浮沉英冠。今季英超出貨焦點之一係水晶宮，射手桑馬迪達埋門終被撬走，球會大賺幾筆後開始大花筒，冬窗購入一啲成咗名進步唔大嘅高價貨作替補，只怕下季換教練團先嚟出事。最強倖存者係般尼茅夫，放走上屆5大主力收取約3億歐元，拆骨都唔死，近期成功反彈快上岸。法國小國腳高洛比去年年初用千多萬歐元，正式加盟半季即爆紅，啱啱又嚟多個巴西小前鋒拉恩域陀唔使3千萬歐元俾佢成長。新星生生不息，新一年主場已連勝熱刺同利物浦，以弱勝強係呢個叢林一樣玩得愉快，有啖好食。