洲際國家盃於周六開戰，當中會有3支歐洲球隊——俄羅斯、德國同葡萄牙參加。俄羅斯經歷近年頹勢，現由前國家隊門將車捷索夫領軍，這次主場出戰，以効力國內球會嘅球員為主力，近年俄國足球水準，的確不及希丁克或艾禾卡特執教嘅年代，正處於新舊交替。以實力嚟講，德國本來最強，但係早喺年初，領隊路維已講明會喺呢項比賽選用新秀，一眾主力如曉姆斯、奧斯爾同卻奧斯等全數冇入選。葡萄牙去年喺歐國盃決賽出人意表咁擊敗法國捧盃，但唔少主力已年過30；C朗拿度雖然入選，但經過一個漫長球季，對於呢項賽事未必太上心。今屆比賽缺少咗對上3屆冠軍巴西，令賽事失色不少，但話唔埋戰果會出人意表。