歐國外列強無乜邊隊有出線大危機，只見大賽常客瑞士危少少，排緊D組第三，今晚主場挑戰榜首愛爾蘭。瑞士貴為歐國聯A2組首名，依例下年3月有機會踢附加賽，趕上決賽周尾班車，所以今晚未算生死戰。這支逾半隊正選踢緊德甲嘅中歐兵團，長欠一位有上佳入球能力嘅射手，但每每能夠掹車邊入圍踢足球大賽，正好見證歐洲隊逃生門多。
十字國缺鋒，毗鄰嘅法國隊前鋒爆瀉，異數更係「銀河唯一」基奧特今屆響車路士開季近至今踢唔夠120分鐘，但呢位33歲嘅柱躉箭頭照係「高盧雄雞」嘅主力。當然，法國出線難度全無，加上當打嘅奧士文尼迪比利、安東尼馬迪爾同拿卡錫迪養緊傷，主帥迪甘斯亦樂意讓這位世盃功勳前鋒，掉轉用國家隊比賽，博表現喺下年初離開車路士。基奧特還好，人工唔貴又入到波，跟老友哥斯尼條路返法甲，係一個好選擇；再看佢嘅前阿仙奴隊友奧斯爾，人工超貴，又係俾兵工廠半放棄，返唔到已背棄嘅德國，斷估唔想投進陷入戰亂嘅土耳其懷抱啩？