法比硬碰，比利時贏口碑，愈踢愈搶眼，武器場場唔同；法國一直係奪標熱門之一，表現穩步上揚，唔算好sharp，邊隊先入決賽，都係冠軍之選。好多人話馬天尼斯配亨利好掂，呢個比利時「教練配」，上任唔夠兩年，將呢支「歐洲紅魔」由個人化打造成識打整體戰嘅強隊，但今屆卻見場上兩核奇雲迪布尼同夏薩特，星味濃但有啲貌合神離。無可否認，比利時攻力極強，近23場不敗兼攻入78球，近兩仗用費蘭尼屈機，加埋迪布尼打番出曼城嘅顛峰水準，踢走日本同巴西；但對住同級兼身形一樣高大嘅法國，應該冇咁嘅優勢。
兩隊同樣擁有鋼門，比利時眾星大熟，但法國有超新星、「電兔」基利安麥巴比外，唔好忘記，今屆佢哋仲有零入球嘅中鋒基奧特撞散敵衛。柱躉中鋒「真9」今屆復活，但其實2006年嘅盟主意大利中鋒東尼同2014年德國嘅高路斯，埋單都係入咗兩球。睇到成隊比利時最唔穩嘅，係老中堅高柏尼，佢真係要小心法國三叉戟，而今場跑出嘅，可能係亨利最唔欣賞嘅法國前鋒、「銀河唯一」基奧特。