上季「藍月」曼城膺國內三冠王，當中聯賽1分力壓利物浦，而聯賽盃決賽只係靠互射12碼贏另一藍軍車路士，可見英超列強去到埋身肉搏，實力更接近。「兩藍」今屆組軍同樣較靜，哥迪奧拿貴精不貴多；林柏特因車仔受轉會禁令所限，重用年輕人，狠棄前朝老兵，反而愈踢愈好。哥迪奧拿講過，佢哋每日都要同國內及歐洲勁旅戰鬥，頂級球員先有咁嘅級數應付，言下之意，自家栽培嘅青訓兵，冇個夠班立足一隊；所以就算隊中後場持續受嚴重傷兵困擾，暫時只得一位青訓兵菲爾科頓叫做會用下，開季聯賽夾埋都係踢咗25分鐘後備，硬要場場用巴西老防中費蘭甸奴，墮後踢中堅。
相反車仔季初已彈起美臣蒙特、譚美伊巴謙、湯姆利同啱啱「戴帽」嘅基斯甸普列錫4新人，迫出嚟成就，相信林伯都意想不到。如今兩藍聯賽只係差兩分，周中聯賽盃半力同踢主場應夠入8強，只慮哥帥再唔願用盃賽谷新人上位，恐怕半季過後，榜首利物浦最強對手，變成另一極速蛻變中嘅藍。