7月中主打，非國冠盃莫屬，大會多數只缺唞緊暑嘅南美兵及打緊非洲國家盃嘅非洲兵。每隊打3場計分，90分鐘賽和即互射12碼，定出邊隊攞兩分或1分，賽事水分唔少，但睇落以英超代表最有冠軍相。意甲最多，出夠4隊，原本有球王C朗壓陣嘅祖記陣容最雄厚，但沙利初領兵，頭兩場先喺炎熱嘅亞洲打，擔心hea踢。英超較早開咧，球隊上力要快，上屆冠軍熱刺，陣容穩定係最大本錢；曼聯一眾小兵上個球季已露一手，季前要博蘇斯克查賞識上位，鬥心最強。至於阿仙奴先鬥德國拜仁，暫冇重點新兵，又有隊長罷工；最怕見到中堅「細梅」梅斯達菲嘜對方射手「羅拔仔」最牙煙，留喺美國7日打3場，尾輪鬥皇馬，廠迷對捧乜盃應該早已沒期望。
兵工廠未來5年再同「三間牌」合作，每年執6,000萬英鎊，水頭其實非常充足；剛新出一件三間牌阿仙奴大人波衫，唔計印字都要600港元，除非大股東高安基肯放水增兵，否則冇乜球迷會想印「高薪低能」嘅奧斯爾落背脊啩？