國米如何擊敗曼城
要做英超三冠王，極難！24年前嘅曼聯，英超1分壓阿仙奴、英足盃2粒贏紐卡素，尾門歐聯決賽靠補時入2球反勝拜仁，最後11天3場大戰全勝，成就前無古人嘅大業。曼城下半季勢頭勁過當年曼聯，向好處諗一早可以hea踢留力爭盃；但季尾戰意減，英超對住今屆奇兵白禮頓同賓福特共取1分，結果上次盃仔贏曼聯有啲驚險。艾寧夏蘭特對上7仗其實只入1球同1助攻，好多場波俾對手中堅盯死；反而掩護到轉踢攻中嘅根度簡，近6仗入6球，但奇牌早用。
今屆3場歐洲盃賽，包括明晚歐協聯，戲碼都唔算強；但歐聯決賽形勢似一面倒，反而比賽張力十足。喺歐聯守力出眾嘅國米，有乜把炮可再造驚喜？意大利隊喺大賽嘅發揮同心理質素一向出色，國米季尾12場贏11場，銳過藍月，包括意甲煞科戰強陣練兵贏波。曼城今屆33個英超失球，有11個來自死球，國米用最強兩翼衛壓制對手由後場組織攻勢之餘，可嘗試多製造死球威脅；下半場出「魔獸」盧卡古喺前面再爆過，睇下呢位英超棄兵，會唔會先係阻止英超再有球會三冠王嘅關鍵先生。