德國大熱有理
歐國盃冠軍難估過世盃，但星味同戲味濃郁。丹麥1992年臨時加入，譜出封王神話；球迷之選三獅上屆喺自己主場，決賽射輸12碼繼續冇冠命，傷盡球迷心，又證明粒粒皆星都未必係真命之子。德國國家隊霉咗好多年，喺今屆賽事仲係大熱之一，總有原因，大有機會玩足成個月殺到入決賽。
首先主辦國抽籤例著數，德國揭幕戰喺安聯劏蘇格蘭冇懸念，只要順利首名出線，企喺上線避開法、英兩大勁敵，入決賽前牌面最強對手只係「雙牙」。葡萄牙撇唔甩老退C朗浸味，西班牙因皇馬獨大令西甲水平走低，空有潛質新星，但舊將唔多似喺決勝時刻孭到飛。
再計對上3個主場主辦國，04年葡萄牙、16年法國及21年英格蘭(主辦國之一踢溫布萊)全部入到決賽，證明主場有利。德國少帥拿高士文，福氣比得上英格蘭修夫基，隊內球會好手又旺又勇，夏維斯回勇打9號，拜仁外，多蒙特、利華古遜及史特加等國內新星任選，皇馬雙霸中堅魯迪格同中場卻奧斯鎮住中後場，唯一變數只怕鋼門將紐亞發波瘟。