歐國盃真黑馬
英格蘭一眾高薪球星，喺主帥修夫基調教下，各自為戰，進攻冇套路，球隊臨場調動能力更評分零蛋；死裡逃生後，嚟緊鬥今屆奇兵瑞士，對手整體戰更強，期望絕殺王祖迪比寧咸一再救世，不如嚟緊幾日加操12碼，以免3年前嘅傷口復發。
今屆歐國盃淘汰賽線路係「上強下弱」，但下線嘅英軍有運保命，衞冕意軍陣亡，瑞士雖奇，但大賽總欠冠軍相；今晚壓軸出場嘅奧地利，更似黑馬。奧軍連續6屆世盃不入決賽周，但上屆歐國盃16強只係加時輸畀意軍，今次大軍冇咗受傷嘅防守大將阿拉巴，但自從兩年前由「德國現代足球」之父蘭歷克領軍後，戰績冒升，擅長收窄中後場空間再打反擊；蘭帥雖老但果敢，分組賽陣容變動多，膽敢4中堅輪流踢，上仗絕殺荷蘭，展現今屆歐國盃難得見到嘅進取，尤如清泉。今晚對手土耳其雖然支持者眾，但踢法一向欠紀律性；奧軍有12人踢緊德甲，亦如半個主場；贏到土軍可能4強再遇荷蘭，呢條下線或喺度寫緊1992年丹麥、2014年希臘後嘅歐洲神話。
