近期大獲好評嘅電影《打死不離三父女》中，摔跤爸爸用嚴父身份，令兩愛女出人頭地，自己得償夙願，令人感動。輸一、兩場唔緊要，最緊要起身快；但作為隊中最好波嘅阿仙奴主將阿歷斯山齊士，一再喺球隊輸緊波時，坐喺後備席冷笑遮醜，這種態度要不得，再好波也留不得。
阿仙奴俾利物浦狂贈四蛋。陣式可變，但士氣不可一日回來，雲爺爺始終沒有曼聯費Sir當年嘅霸氣同果敢，太過寬待一眾子弟兵；自己續約拖拉，一眾就快約滿嘅球星又係玩拖字訣。早被調離場嘅山齊士，喺後備席偷笑，最叫人氣餒，影響隊內士氣；何不決斷啲，送走佢賺番幾千萬鎊轉會費，咪更合乎雲加嘅經濟原則？
費Sir當年金句中，曾論雲加：「有人話佢係一個好有智慧嘅人，對嗎？他識五國語言，但我隊內有一位15歲嘅科特迪瓦小伙子，一樣識五國語言。」轉會窗快關門，寄望雲加咪學2011年作客曼聯輸2比8後，瘋狂增兵，擸巴西左閘安迪山度士、以色列中場班拿約同南韓前鋒朴主永，最後長放後備席。畢竟攘外必先安內，才是治軍之道。
