今晚英超舉行默西塞德郡打吡，由愛華頓主場更撼利物浦。「拖肥糖」上仗主場2比1擊敗阿仙奴，終止聯賽連續5場不勝頹勢，佢哋今季主場甚有戰鬥力，8戰取得4勝4和保持不敗，雖則平均每場入只1.5球，但勝在防守力強，每場只失0.75球。紅軍今季表現比以往穩定，上仗作客3比0大勝米杜士堡，目前少踢一場落後「一哥」車路士9分。佢哋今季冇歐洲賽包袱可以專心聯賽，除咗主場至今不敗之外，作客亦有不俗表現，至今贏過5場，曾擊敗過阿仙奴、車路士及賽和熱刺等前列球隊。對賽方面，紅軍近6次到訪葛迪遜公園球場，錄得1勝4和1負，可算係均勢，紅軍雖然實力佔優，但拖肥糖主場硬淨，唔排除再一次言和。
