四年一度又世界盃，感謝《am730》俾個地盤我喺度講下波經，接下來呢四個星期都會同大家分享下我嘅睇波心得，同埋最重要就梗係——俾貼士！廢話少說，首先貼咗冠軍心水，再俾多隊心水黑馬之選大家。
冠軍之選？好簡單，我揀巴西。
巴西今屆陣容不俗。
本人每逢大賽都會提及「10倍定律」，係指由2002年開始，所有世界盃冠軍，開賽前冠軍賠率都必定唔夠10倍，最冷已經係2006年嘅意大利，但其實都唔夠10倍。所以，根本冇咁多「神話」。如果你同我一樣都信呢個定律的話，已經可以踢走一大堆「黑馬」。
呢個定律下，已經得返5隊。巴西阿根廷法國西班牙英格蘭。
南美球員較識得留力
然後計埋「衛冕冠軍魔咒」，基本上得返巴阿西英四隊。個人覺得南美球隊秤先少少，一來當然係天氣因素，畢竟歐洲球員唔太擅長喺炎熱天氣下作賽；︁二來就西英兩隊近況麻麻，而且各大聯賽為咗遷就今屆世界盃，紛紛開快車趕賽程。據我唔太科學嘅觀察，南美球員似乎喺聯賽開咧後比較識得留力，體能上應有優勢。
而最後點解唔係阿根廷？巴西今屆前中後三線都相當完整，但主要嘅優勢係後備兵源充足，前線嘅攻擊手又後生又多面向，喺今屆可以換五個後備球員嘅賽制下，喺戰術上可以提供更多嘅可能性。
至於黑馬之選，我自己偏愛丹麥，入八強絕對無問題，甚至有力挑戰四強。
丹麥身處相對易踢嘅D組，基本上出線唔成問題，甚至有力壓過法國做小組一哥。事實上今年丹麥同法國先後兩次喺歐國聯碰頭，丹麥無論主場作客都贏到法國，反映呢支球隊絕對有足夠實力挑戰一眾列強，扒冷嘅朋友不妨留意一下。