本欄兩星期前預言摩洛哥「雄獅睡醒」，非洲破位最大希望；如今摩軍歷史性突入4強，非洲隊歷來不斷嘅失敗，未出現喺呢頭雄獅身上。球員貪錢同足總拗數爭出場費？摩軍主將薛耶治一直將國家隊所得獎金捐返國內。將帥唔齊心，好似喀麥隆踢走唔聽話嘅門將奧拿拿？摩軍歷格古唔係外國教練，8月上任後深得人心，尤其重召車仔失意人薛耶治，盡情俾佢喺世盃爆發。防守冇紀律？今屆鋒強嘅加納同入到淘汰賽嘅塞內加爾同一通病，不過摩軍4戰歐洲隊未失一球，史上從未見過，防中「4號仔」爆紅。
摩洛哥最強賣點
大部分球星場外焦點係WAGs(妻子同女友)，但摩軍最強係賣溫情，教練同球員嘅媽媽，場場賽後同愛子慶祝、邀請佢哋入場跳舞；一班摩兵打甩髀，士氣超強，4名正選守將3件「打柴」，上仗都守到鬥葡軍唔易。喺非洲足球壇一直跟「泊慣大巴」嘅摩連奴被相提並論嘅教頭歷格古，原來攻心為上，落得場嘅球員實力差距唔大；佢哋4強點擋得住法國，以弱勝強，都係欣賞世盃一大樂事。