爆冷多，和波多，點解？
今屆世界盃非比尋常，年尾季中先嚟踢，主辦國唔畀飲酒，仲有種種政治人權爭議。不過睇到暫時，最唔尋常嘅係兩樣嘢：爆冷多，和波多。
先講爆冷，好多人會事後孔明，「摩洛哥贏比利時唔係爆冷，比利時班友咁老，迪布尼自己都咁講」、「日本贏德國唔係爆冷，德國呢啲只係偽強隊」——但要認真研究，好簡單，睇賽前賠率。冷門嗰隊贏，咪就爆冷。咁今屆，明顯係比較多爆冷嘅。本欄唔係講賭波，但留意賭率就會見到部分現象。
有人以為，爆冷連連，輸死賭波公司。完全錯。賭波公司，邊有死錯人？熱門冷門都好，the house always wins。不過真係要揀的話，賭波公司鍾意爆冷多過熱門。諗下都知，一場阿根廷，已經殺咗唔少賭仔，聽聞唔少仲係買阿根廷上盤(即係大炒沙特阿拉伯)。沙特爆大冷贏波，但你冇識人買？我就冇啦。
喀麥隆3分鐘轟兩球3：3迫和塞爾維亞。
和波機會被低估
點解爆冷連連？未必因為地理，可能真係因為年尾季中先嚟踢，而歐洲隊球員之前又歐國聯，又歐聯，又本土聯賽，殘殘地。原本以為換人名額多咗，又有VAR，弱隊難偷雞，結果唔係。至於和波，今屆亦係比較多，特別留意半場和波更係特別多，零比零都唔少。至於點解？我就真係唔知。事後孔明咪話大家踢得保守。但點解保守？唔知。
不過可以留意一樣嘢，我在Patreon都寫過。絕大多數人，係低估和波嘅機會。例如公司玩估波遊戲，估晒咁多場分組賽結果，你發現應該冇一個人估到咁多和波。每屆都係，今屆特別係。點解好少人估和波？相信同人嘅心理有關。人總係鍾意啲嘢分到勝負，非黑即白，呢個忠嘅呢個奸嘅。但足球偏偏係一個low scoring game，往往都分唔到勝負。